2011/03/28

APIRILEKO TESTU BAZKA


Udaberriarekin batera zuhaitzei hostoak bueltatzen zaizkien moduan, gurera ere orriak bueltatzen dira. Literatur lanena. Testu bazka-ren bidez. Oraingo honetan, eta Aste Santua bertan dela baliatuz, Kima euskara taldeak Biblia ezagutzeko gonbite egiten dizu. Zehazki Kantarik ederrena liburukia eta beste batzuk. Hitzordua hilaren 6an, asteazkenean, jarri dugu, 19:00etan Gure Etxea eraikinean (2. solairuan, mahai beltza duen gelan).

2011/03/25

ORRITZ DANTZA TALDEAREN JAIALDIA

Badira urte batzuk Udaberriko Dantza Jaialdia ospatzen ez zela Irurtzunen.

Orritz Dantza Taldeak antolatuta eta Irurtzungo udalaren laguntzarekin, aurten kanpoko 2 talde eta Orritz anfitrioiaren artean Dantza Jaialdi koloretsua eskainiko dute datorren astean, martxoaren 26an Irurtzungo Frontoi estalian arratsaldeko 20:00etan. Sarrera dohainik da eta ASTURIASko Lugonesetik etorritako LA SIDRINA taldeak, BEASAINgo AURTZAKA Dantza taldea eta ORRITZek ordu beteko Dantza saioa beteko dute.
Elkartruke folklorikoa da eta horregatik eta eguraldiak laguntzen badu, 19:00etan Kalejira bat egingo dute talde guztiek herrian zehar bakoitza bere musika eta trajeekin. Gainera lanak ondo bukatu ondoren elkartutako talde guztiek elkarrekin afalduko dute. Geroago FOLKLORE FESTA egingo da PIKUXAR Euskal Txokoan. DJ ELEPUNTO egonen da gaueko 00:30etik aurrera.

Denak zaudete gonbidatuak ORRITZek ilusio handiz antolatzen eta eskaintzen duen jaialdi honetara!!
A! Eta Asturiarrak ikusteko gogotan geratzen denak aukera izango du igandean ere, LAKUNTZAn dantzatuko baitute berriro 13:15ean plazan.
Kartel polit hau, Ibai ViƱas artista Irurtzundarrak diseinatu du. Eskerrik asko Ibai!!

2011/03/16

Martxoko bigarren testu bazka


Martxoan ere ez du hutsik eginen Testu bazka-ren bigarren saioak. Kima euskara taldeak Irati Jimenezen Zure Bonnie, nire Clyde lana ezagutzeko gonbite egiten dizu. Hitzordua hilaren 23an, asteazkenean, jarri dugu, 19:00etan Gure Etxea eraikinean (2. solairuan, mahai beltza duen gelan).


2011/03/15

Bertsozalea zara??????


KOPLA IDATZI SARIKETA



Parte hartzaileak
: AEK-ko euskaltegietako ikasleak zein praktika egitasmoetako lagunak.
Egin beharreko lana: 6 koplaz osatutako bertsoaldi bat idatzi. Doinua: ama begira zazu, ikusi nuenean
Gaia: Euskalakari baten eguna

Saria: Afari edo bazkari bat sagardotegi batean, bi bertsolarirekin irabazten duen talde osoarentzat.

Azken eguna: Apirilak 1.
Nora bidali: Helbide honetara
Epaile lanak: Bertsozale Elkartea.

Oharra: Bertsoaldia idaztea eta bidaltzearekin aski da baina bertsolaritzan doinua ere ezinbesteko osagaia denez, baina koplak abestera animatu nahi zaituztegu; beraz, grabatu eta bidali. Bideoz iristen diren bertsoaldiek puntu gehigarri bat izanen dute.

2011/03/10

Irurtzungo inauteriak bereziak izan dira

Aurten, Atakondoan, Eskola Kontseiluko Jai Batzordeak , inauterien gai nagusia zein zen jakin ondoren, lanari ekin zion zenbait ekimen prestatzen, eskola girotzeko eta ikasle handiei lehentasuna emateko asmoz,. Hala bada, familia orori eskuko egitaraua helarazi ahal izateko, ikasgela guztietan marrazkiak egin ziren eta ESO – DBHko ikasleen ordezkariek hautatu zituzten egitarauan argitaratu zirenak.

Aurtengo gaia orokorra “ Munduko jantzi eta kulturak” izaki, Atakondoan dauden mundu osoko ikasleen gurasoei eskutitz bat bidali zieten , haien lurraldeetako jantziak edo apaingarriak eskolara eraman zitzaten, eskolako sarreran kokatu , eta denon artean konpartitu eta ezagutu ahal izateko. Ekimen honek arrakastatsua izan zen eta zenbait familiek oso ongi erantzun zuten , etxean zituzten jantzi eta osagarriak eramaten, erakusketa koloretsua sortuz.

Eskolako atarian eta baita egitarauan inauteri hitza sei hizkuntzatan jarri zen: Euskara, Gaztelania, arabiera , txinera, ingelesa eta bulgaroa, eskolako haurren hizkuntzek ordezkatuak egoteko.

Pasa den urtean Mari Gorri panpina ez zen erre, elurra baitzegoen eta ikasle handiek berrapaindu zuten erakusketaren protagonista izan zedin.

Zikloka, mailaka, oso mozorro alaiak eta anitzak ikusi izan ziren polikiroldegian egindako desfilean. Haur Hezkuntzakoak dragoiak eta guzti lagunduta, txinatarrez jantzi ziren. Lehen Hezkuntzako hiru mailek zuluez, eta maila batek arabiarrez egin zuten desfilea. Bigarren zikloko guztiak mexikarrak bihurtu ziren . Hirugarren zikloan barietate handia izan zen: ekuatoriarrak , indioak, hawaiarrak eta Kolonbiarrak izan ziren goiz batez. DBHkoak Andaluziako jantzi eta dantza erakutsi zituzten eta baita Historiari bisita eman zioten erromatarrez mozorratu baitziren. ESOko ikasleriak ez zion eutsi inauteriari eta zenbait neskak salbatu zuten beren txanda eskozesaz jantzita .

Desfilea bukatu ondoren, ikasleria geletara abiatu zen , Apymak emandako gosaria gustura jatera. Eguraldia kaxkarra egin arren, kalejira animatua baina motza, egin ahal izan zuten ikaslek, irakasleek eta guraso eta herritarrek, udalak ordaindutako txarangaren musikaz lagunduta, Etxera joan aurretik; Mari Gorri panpina erre egin zuten, datorren urtean berriz, paperezko bihotza izan ahal izateko, eta urtean zehar igarotako ezak eta une txarrak suak berarekin eraman zitzan.


KIMA taldekoen hausnarketa




Kaixo,

Berriki bukatu da ikastetxeetan aurre-matrikula egiteko epea. Iaz Sakanan 5 haurretik, 4 D ereduan matrikulatu ziren. Emaitza ona da eta lan eta ahalegin handien fruitua.



Urteekin, D ereduak erakutsi du kalitatezko irakaskuntza dela. Haur euskaldunek nahiz erdaldunek bi hizkuntza ofizialak ikasi eta emaitza onak lortzen dituzte; baita atzerriko hizkuntzetan ere. Orain ezin da esan aspaldian esaten zen bezala: “Vasco ser, ir a la escuela y no aprender”

Baina kasu honetan, botilaren alde hutsari begiratu nahi diogu. Izan ere, ikasleen %20k, D ereduan ikasten ez dutenek, ez dute euskara maila ona lortuko. Sakanan, Euskal Herriko toki askotan ez bezala, aukera dago bi hizkuntza ofizialak ikasteko. Orduan, ikasketak bukatu eta euskara ez jakitea, ez al da aukera galdua?


Gurasoek badute eskubidea haien seme-alaben ikasketa eredua aukeratzeko. Baina eskubide horren gainean, badago seme alaben eskubidea hezkuntza ona jasotzeko. Eta gure herrian hitz egiten diren bi hizkuntzetatik bakar bat ikasten badute, hori hezkuntza ona izaten da? Zer gertatuko litzateke ikastetxe batean txinera edo arabiera edo alemana ikasiko balitz baina gaztelera ez? Esango genuke ikasle horien prestakuntza ona dela? Etorkizuna erraza izango litzateke haur horiendako?



Gizarte honetan funtsezkoa da heziketa ahalik eta onena izatea. Hizkuntz bakar bat fundamentuz ikasten bada, dela gaztelera, dela euskara, dela beste bat, esan dezakegu heziketa ona dela?



Eskolan, euskararen presentzia ez da opari bat izan. Lehen, ilegala zen, gero alegala, eta azkenean legala (mugek badiraute, baina). Aurrerapausoa herritarren esfortzuari esker lortu da, erdaldun eta euskaldunena. Nafarroako Euskararen Legearen arabera, “gure” Gobernuak Euskara sustatu behar du. Baina gai hau, ez al da garrantzitsuegia Gobernu baten eskuetan uzteko? Gure inguruan, guk ere sustatu al dezakegu Euskara? Erantzuna, zuek eman.



Kima euskara taldea

www.altsasuneuskaraz.com




Irakurri eta zabaldu!!!!!!!!!!!!

Ondo Izan

2011/03/08

Inauteriak, inauteriak eta inauteriak



Altsasun

Urbasa eta Aralar mendiez inguraturik, Altzania mendiaren oinetan, Burunda eta Altzania ibaien elkargunean, hantxe dago Altsasu, Sakanako herrigunerik garrantzitsuena. Nafarroa, Gipuzkoa eta Arabaren arteko komunikazio ardatza da, bai errepidetik bai trenbidetik, eta, ondorioz, industria gune garrantzitsua da.

Badira ehun urtetik gorako etxeak, portaleak eta bao txikiak dituztenak; guztiak Jasokundearen Andre Mariaren elizaren inguruan. Elizaren barrualdean, erretaula erromanista aparta ikusi daiteke, horren eskulturek eta polikromiak ezin estimatuzko kalitatea dutelarik.

Foru plazan Jose Ulibarrenaren eskultura bitxia dago ikusgai. Antzinako intxaurrondo batez baliaturik, irudi ezberdinak landu zituen, Altsasu funtsean zer den bikain irudikatzen dutenak: ohitura errotu-errotuak, mitologia, natura, pilota eta musika.

Herriaren erdialdean, lorategi batean, tren-makina "japoniar" elektriko bat jarri da, Espainiako trenbideen sarean ibili zen mota horretako lehenbizikoetako bat. Berez, museo pieza izateaz gainera, Sakanako turismo bulego berriaren egoitza da.

Herritik hurbil, Otadiako Kristo mirarigilearen baseliza altxatzen da; barruan, erretaula barroko batean, XVI. mendeko Kristoa ikus daiteke.

Unanun

"Mamuxarroak" jantzi zuriaren gainean gerriko gorria, aurpegia ezkutatzeko metalezko maskara eta buruaren nahiz lepoaren gainean koloretako zapia daramaten pertsonaiak dira. Makila luzeak eskuan, bidean topatzen dituzten guztiei mehatxuka eta joka aritzen zaizkie.

Ohitura da euren biktimak, neskatxak normalean, harrapatuak izan ondoren belauniko jartzea, eta "mamuxarroak" kopetan gurutzea egin eta gero neskatxak belaunean muin eman behar izatea.

2011/03/01

Martxoko testu bazka


Martxoan ere ez du hutsik eginen Testu bazka-k. Kima euskara taldeak Eider Rodriguezen Katu jendea lana ezagutzeko gonbite egiten dizu. Hitzordua hilaren 9an asteazkenarekin jarri dugu, 19:00etan Gure Etxea eraikinean (2. solairuan, mahai beltza duen gelan). Astearte inauteriaren ondoren hain justu.